نصائح هامة جدا لمرحلة تقديم السي في و الانترفيو على لسان خبير فى الموارد البشرية

نصائح هامة جدا لمرحلة تقديم السي في و الانترفيو
السلام عليكم و رحمة الله و بركاته

بما اني بشتغل في ال H.R و التوظيف و كدة و ده فرض عليا اني اشوف الاااف السيفيهات و الشخصيات فأنا عندي ليكو شوية ملاحظات
ركزوا معايا
ركزتو؟
ركزتو خلاص؟؟؟
يالا نبدأ

أولا مرحلة انك تشوف اعلان على وظيفة و تبعت سي في:
- يا ريت حضرتك تركز في الوظيفة المطلوبة و متبعتش تسأل اسئلة من نوع ايه مهام الوظيفة او ايه طبيعة الشغل، لأن غاااالبا كل وظيفة معروف هتعمل فيها الا إذا كانت وظيفة من نوع مثلا "مطلوب تايهتع لكوكب المريخ" . في الحالة دي ممكن تسيرش عالانترنت و بردو تعرف مهام الوظيفة دي ايه بالظبط و بعدين تبعت السي في.

- الناس اللي قبل ما تبعت سي في بتبعت تسأل عن مواصفات الشركة وأجازاتها امتى و فيها تأمين و لا لأ و مواعيدها ... أكيد محدش هيسيب ال500 سي في اللي وصلوا و يتفرغ يرد على اسئلة سيادتك الجوهرية و خصوصا انك اكيد هتعرفها في وقتها المناسب.
- الناس اللي بتبعت رقم تليفونها من غير سي في و عايزانا نكلمها: لا تعليق طيب ممكن حضرتك تكتب معاها الوقت المناسب بحيث لما نكلم سيادتك منزعجكش؟

- أرجوووك لما تبعت ايميل ما تسيبش السابجيكت او عنوان الايميل فاضي لأن ده غير انه بينفخنا فده ممكن يودي ايميلك في السبام و تبقى ضيعت على نفسك الفرصة يمكن كنت تستحقها و غير كدة كمان بيدي انطباع ان حضرتك شخص غير مهتم.. اه و الله لو مش مصدقني اقرا الكتاب 

- يا سلام بقى لو زيادة كرم منك تكتبلنا كلمتين حلوين كدة جوه الايميل تعرفنا بنفسك و احنا هنفتح سي في مين .. عبرنا بردو يا اخي ده احنا زي اخواتك 

- لما السكرتيرة تكلمك تديك معاد الانترفيو: وحيااااة ربنا السكرتيرة ما تعرفك اصلا و لا تعرف هتقبض كام و حياة عيالك يا شيخ ما تسألها المرتب كام عشان هي بجد متعرفش و كمان تعالى شوفنا يا اخي مش هتخسر حاجة و يمكن لما نشوفك و نلاقيك فذ نشغلك بالمرتب اللي تطلبه يا سيدي 

- مش هوصيك عالسي في بقى المفروض انك تكتب في السي في كل قدراتك و كل الحاجات اللي بتعرف تعملها و تبقى السي في مرايا ليك و بلااااااش بلااااااش بلاش الفتي في السي في و تكتب ان معاك فرنساوي مثلا ويطلع علاقتك بالفرنساوي كتاب اولى ثانوي و تانية ثانوي فاكرهم؟ او تكتب انك محترف في كل لغات البرمجة و الواقع انك مش كدة و هكذا ... كله بينكشفن و يبان :))

ثانيا مرحلة الانترفيو
أول حاجة بلاش تدخل تقول يااااااااه دانا دوخت على ما وصلتلكو و تبان انك متفرهد و بتلف بقالك 16 ساعه! احنا نحب نشوفك هادي كدة و جميل و متفائل و مقبل على الحياة.. فحتى لو دوخت فعلا معلش خليها في سرك 

أول ما تدخل غرفة الانترفيو ابتسم في وش المحاور و قوله سلام عليكم و يحبذا لو سلمت عليه مش تدخل تشوف اول كرسي و تقعد عليه تبصله!! 

 

مش داخل الترام انت لما تبدأ تتكلم مع المحاور او الشخص اللي بيعملك الانترفيو يا ريت تبدي بعض الاحترام( حضرتك - لو سمحت - بعد اذنك) و بجد مش عشان هو احسن منك و لا حاجة بس عشان ده الذوق و كمان ده بيدي انطباع عن ذوقك و اخلاقك و المكان اللي انت جاي منه.

مع المحاور بلاش تستخدم الفاظ زي : بص يا سيدي - فاهمني - انا اقولك .. الحاجات دي!! مش قاعد مع خالتي اللتاتة هو !!ده انترفيو رسمي :))

لو .. لووو لا قدر الله المحاور سألك تكلمه عن سيرتك الذاتية أو اي بيان موجود فيها بلاش الاجابة المذهلة بتاعت منا باعت سي في فيها كل حاجة معلش حضرتك ادينا شوية من وقتك اصل احنا فاضيييييين بصراحه :))

وانتي يا حبيبتي.. حبيبتشي ... ايوة انتي :)) ليا عندك شوية طلبات عشان خاطر النبي
ارجوكي .. يا رب تتجوزي اللي بتحبيه :)))) تفي اللبانة و انت داخلة الانترفيو يا اختشي و لو يعني اللبانه من نوع غالي او ترايدنت الزقيها في طرف اي حاجة لحد ما تخرجي :)))

 

 ثانيا طالما الانترفيو مش بعد الساعه 10 بالليل و حياة ابوكي رجاء خاص و رجاء الجداوي و رجاء بلمليح ... خفي الميك اب شوية و بلاش الازرق و الترتر و الحاجات دي ده انترفيو عااادي يعني مش فرح . حرام عليكو عنينا

اخيرا
يمكن انت كمتقدم عادي للووظيفة تلاقي عندك خطأ واحد من دول و تستغرب الباقي او تقول دي مبالغة. لكن الحقيقة اننا كمسئولي توظيف فعلا بنشوف كل ده
الوظيفة حاليا بقى صعب الحصول عليها فبلاش تضيعها منك و تضيع امكانياتك و احقيتك بالوظيفة لمجرد ايميل من غير عنوان يروح عالسبام او سؤال مستفز مش في وقته يعطي عنك انطباع خاطئ او تصرف مش مقصود يقفل المحاور منك
احنا حقيقي بنتمنى التوفيق للجميع و بكتب ملحوظاتي بغرض الافادة و الله حتى لو بدن ليك ساخرة شوية

شيرها بقى عشان صحابك يعرفوا :))

 المصدر  : مدونتى  http://blogg-y.blogspot.com/ الكاتب : quik connect 

اقرء المزيد

30 سبب يجعلك مرتاحا لكونك رجلا

30 سببا يجعلك مرتاحا لكونك رجلا

1- المكالمة التليفونيّة تنتهي خلال 30 ثانية .
2- تستحم و تكون جاهزا للخروج في 10 دقائق .
3- رحلة لخمسة أيام تحتاج حقيبة واحدة فقط .
4- الأصدقاء لا يهتمّون اذا ازداد وزنك أو نقص .
5- الحلاّقين و الكوافيرية لا يستطيعون سرقتك " عينك عينك ".
6- عند تقليب المحطات على التلفاز لا داعي للوقوف عند كل لقطة فيها واحد يبكي .
7- ليس هناك من داع لأن تحمل حقيبة ممتلئة ب" أشياء ضروريّة " كلّما خرجت .
8- تستطيع الذهاب إلى الحمّامات العامّة دون فرقة دعم أو مرافقة !!!
9- الكنية (اسم العيلة) يبقى نفسه مدى الحياة .
10- تستطيع ترك غرفة الفندق دون الحاجة لترتيبها .
12- إذا نسي أحد اصدقائك دعوتك لمناسبة ما ,لن يتسبب ذلك في تدمير صداقتكما .
13- الأزهار تحلّ جميع المشاكل !!!!!
14- ثلاث أزواج من الأحذية هي أكثر من اللاّزم .
15- مش بتفرق لو محدش لاحظ قصّة شعرك الجديدة .
16- مزاج واحد في جميع الأوقات !!!!
17- الشعر الأشيب : هيبة و جمال .
18- لا تهتمّ إذا كان في حدا وراك بيتكلم مع حد تاني .
19- الريموت كونترول لك , و لك لوحدك .
20- اذا مضى وقت طويل و لم تتحدث بالهاتف مع صديق , لن يقول هذا الأخير بين أصدقائك : إنّ "فلان " متغيّر .
21- إذا كنت في حفلة و ظهر أحدهم بنفس ملابسك , يمكن أن تصبحوا من أعزّ الأصدقاء .
22- لديك الحريّة المطلقة في أن تربّي شارب أو لا ...!!!
23- نفس قصّة الشعر قد تستمرّ لسنين , ربّما عقود .
24- أنت في الرابعة و الثلاثين وغير متزوّج ... إيه يعني ؟؟
25- كل أعضاء وجهك تحافظ على لونها الطبيعي
26- لا تحتاج لأن تتخلص من شعر بدنك كل فترة وجيزة
27- بإمكانك أن تلبس أي شيء عند خروجك من البيت حتى وبدون تسريح
شعرك إذا لزم الأمر
28- كما تستطيع الخروج بأي وقت دون أخذ الأذن من أحد
29- عودتك إلى منزلك بساعات متأخرة جدا ولوحدك لن تشوه سمعتك

30- الكرش وجاهة

 المصدر  : مدونتى  http://blogg-y.blogspot.com/ الكاتب : quik connect 

اقرء المزيد