اصعب الأسئلة التى تواجه البعض فى المقابلة " الانترفيو " مع اجابتها

اصعب الأسئلة التى تواجه البعض فى المقابلة " الانترفيو " مع اجابتها

ليه قعدت طول الفترة دي مبتشتغلش ؟

عشان تجاوب على السؤال ده ممكن تقول الحاجات اللي كنت بتعملها في الفترة دي، ممكن تتكلم عن أي عمل حر اشتغلته، أو عمل تطوعي أو حتى لو كنتي أم وخدتي أجازة عشان ولادك، أهم حاجة يبان أن الوقت ده تم استغلاله بشكل كويس. ,واستفد منه بحاجة ومش وقت ضايع هباء

ازاي عرفت تيجي المقابلة في وقت الشغل؟

الهدف من السؤال ده انه يعرف هل انت مثلا بتكذب على مديرك عشان تيجي المقابلة لأنك لو بتعمل كده فعلا يبقى هتكذب على مديرك الجديد كمان ….لما تجاوب على السؤال ده ممكن تقول انك واخد اليوم ده أجازة من اجازاتك، وانك بتاخد من وقتك الشخصي عشان تروح مقابلات الوظايف اللي تهمك. مش لازم تحور عشان فى شباب بتخلق الاعذار عشان تسيب الشغل وتروح.

ازاي جهزت نفسك للمقابلة؟

السؤال ده انه يعرف انت أد ايه مهتم بالوظيفة، يعني محضر فعلا ولا بتروح أي مقابلة لأي وظيفة وخلاص، عشان تجاوب السؤال ده بشكل مناسب لازم تقول انك مهتم جدا بالوظيفة دي وانك قبل ما تيجي اهتميت انك تعرف معلومات عن الشركة من خلال الموقع الالكتروني للشركة…ممكن كمان تسأل اسئلة تدل انك قريت عن الشركة والوظيفة فعلا…ممكن تسأل عن اختصاصات قسم من أقسام الشركة مثلا.

ليه المفروض أختارك للوظيفة دي؟

ده من أكتر الأسئلة اللي كتير من الناس مبتعرفش تجاوب عليها وده غالبا لانهم مش بيعملوا بحث كويس قبل المقابلة، اجابتك على السؤال ده المفروض توضح ليه انت أكتر واحد مناسب ومؤهل للوظيفة دي، إقرا كويس عن الوظيفة اللي انت مقدملها زى ما ذكرت فى منشورات سلفا . والمهام اللي هتبقى مسؤول عنها عشان تعرف المهارات الاساسية اللي الوظيفة بتحتاجها واللي هتبني عليها اجابتك بطريقة توضح ان عندك المهارات دي، ويا ريت لو تتكلم عن خبراتك في نفس المجال.

ايه اكتر حاجة بتضايقك في زمايلك في الشغل أو مديرينك؟ ركز بقا معايا

المفروض تظهر في المقابلة كشخص متفائل ومهتم بالشغل ومش بتحب المشاكل، السؤال ده معمول عشان يعرفوا هل هتعمل مشاكل بعد كده مع مديرينك أو زمايلك…يا ريت متفتكرش مواقف ضايقتك من زمايلك ومديرينك قبل كده ..ميبقاش قلبك اسود…ممكن تفكر ثواني كده وتقول انك مش فاكر أي حاجة معينة ضايقتك…يا ريت كمان لو تمدح في مديرك السابق وتقول انه كان عادل واتعلمت منه كتير، وان زمايلك كانوا متعاونين لان ده هيبين انك بتبص للأمور بإيجابية ودي مميزات هتعجب اللي بيعمل المقابلة.

ممكن توصفلي موقف قدرت فيه تحل مشكلة في الشغل أو الكلية؟

السؤال ده مش المفروض يفاجئك لأنه متوقع جدا، وبالرغم من كده كتير من الناس بتفوت الفرصة دي عشان يظهروا مهاراتهم..جهز اجابة للسؤال ده، اتكلم مثلا عن موقف قدرت فيه تنظم الوقت بشكل كويس وقدرت فيه تنجز شغل كتير في وقت قياسي..أو أي موقف تاني يبين مهاراتك.

ممكن توصفلي موقف في الشغل أو المدرسة اتعاملت معاه بشكل خاطيء؟

خد بالك أوي وانت بتجاوب السؤال ده، اللي بيسألك عايز يفهم هل بتتعلم من أخطائك ولا بتكرر نفس الغلط كل شوية أو ممكن كمان يبقى عايز يعرف بتعترف باخطائك ولا لأ…مش مطلوب منك انك تقول قائمة باخطائك وعيوبك لأن ده ممكن يلفت نظره لعيوبك ويقلل من فرصك في انك تتقبل في الوظيفة.. ممكن تقول خطأ بسيط عملته بحسن نية ولازم تقول بعدها الدرس اللي اتعلمته من الخطأ ده واللي خلاك متكرروش تاني.

نفسك تشتغل فين؟

الهدف من السؤال انه يتأكد انك مهتم فعلا بالوظيفة، ويفضل انك متقولش اسم شركة تانية أو وظيفة تانية، الهدف من المقابلة انك تبين اسباب كونك الشخص المناسب للوظيفة اللي انت مقدملها، الاجابة المناسبة على السؤال ده ممكن تكون باختصار: “انا مهتم بالوظيفة دي وده المكان اللي نفسي اشتغل فيه”. 

ليه عايز تشتغل؟ وليه سبت اخر شغل؟

المفروض انك عايز تشتغل أو تغير شغلك عشان تحقق تقدم في حياتك العملية، وتشتغل في وظيفة تعلمك حاجات جديدة وتطور في شخصيتك، عشان كده بلاش تجيب سيرة الفلوس في السؤال ده، لان كده هيبقى شكلك مادي أوي، ولو كنت سبت شغلك اللي فات بسبب افلاس الشركة أو لتقليل عدد الموظفين، خليك متفائل ومتبينش انك متضايق واتكلم عن الموضوع باختصار على قد ما تقدر.

تعرف إيه عن شركتنا ؟

وهنا يجي دور البحث عن تاريخ الشركة ودورها والخدمات اللي بتقدمها…لازم تبقى محضر نفسك للسؤال ده ومجهز إجابته من غير ما يبان انك حافظ وبتسمع.

ليه عايز تشتغل في الشركة دي بالتحديد؟

ممكن في السؤال ده تتكلم من خلال المعلومات اللي جمعتها عن الشركة واللي من خلالها قررت انك عايز تشتغل في المكان ده…قبل ما تروح المقابلة جهز إجابة للسؤال ده، وزود عليها خططك و أهدافك الشخصية اللي انت محددها لحياتك العملية، وازاي شغلك في الشركة دي هيحققهم…حاول تتكلم عن حاجة معينة بتميز الشركة دي، مثلا زي التدريب أو عدد العملاء الكبير أو مكانة الشركة في سوق العمل.

قدمت على وظايف فين تاني؟ قدمت في شركات تانية؟

ممكن تجاوب بصدق في السؤال ده، بس مش لازم تقول انك قدمت في 60 شركة غيرهم عشان كده هيبقى شكلك مش عارف عايز ايه وبتقدم وخلاص، كفاية أوى أنك تقول اسم شركتين أو ثلاثة، ومن غير تفاصيل، الهدف من السؤال انه يبان انت بتدور على شغل فعلا وعارف انت عايز ايه ولا لأ.

اوصف موقف اشتغلت فيه تحت الضغط، واتعاملت معاه ازاي؟

في اجابات كتير ممكن تجاوب بيهم على السؤال ده: ممكن مثلا تقول انك بتشتغل كويس تحت الضغط / ممكن كمان تقول انك بتوصل لأفضل أداء ليك تحت الضغط / ممكن تقول انك فعلا بتفضل تشتغل تحت الضغط.
لو مش عايز تنجح وتعدي في المقابلة في الحالة دي بس ممكن تقول انك مبتشتغلش بكفاءة تحت الضغط! سهلة مش صعبة قولهم بتخنق بس

هل بتشتغل بكفاءة ضمن فريق عمل؟

مفيش اجابة للسؤال ده غير نعم! دي الاجابة الوحيدة اكيد عشان تبقى موظف كفء لازم تكون بتشتغل بكفاءة ضمن فريق عمل، ويا ريت تدي مثال على كلامك من مواقف اشتغلت فيها في فريق… ممكن كمان تتكلم عن مهاراتك كقائد لو عندك المهارات دي فعلا.

ايه هي نقاط القوة في شخصيتك؟

أي إجابة عن مميزات في شخصيتك أو مهارات عندك تعتبر إجابة مقبولة، مثلا ممكن تتكلم عن: قدرتك على ترتيب الأولويات، وحل المشاكل، وقدرتك على الشغل تحت ضغط، أو خبرتك في مجال معين، ومهاراتك كقائد، ونظرتك الايجابية للأمور،…أو أي مميزات تانية شايفها في نفسك… بس خد بالك متحاولش تظهر على انك ملاك لانه كده محدش هيصدقك. متبقاش ابو لمعة اوى

إيه هي نقاط ضعفك؟

الإجابة التقليدية للسؤال ده انك تقول ميزة وتقلبها لعيب.. فمثلا تقول انك بتهتم بالتفاصيل أوي وده شيء مرهق وبياخد وقت أو انك بتشتغل كتير أوي وبتضغط على نفسك جامد! …الاسلوب ده في الإجابة اتعمل قبل كده كتير، وحتى لو كنت بتتكلم بجد، غالبا اللي بيسألك مش هيصدقك.. اكيد عارف الحيلة دي كويس! وعن تجربة والله بلاش الاجابة دى :
لكن فيه طريقة أفضل، ممكن تتكلم عن نقطة ضعف حقيقية فيك وانت اشتغلت عليها وعرفت تصلّحها وتوصف عملت إيه عشان تصلحها، مثلا ممكن حد يقول أنا كنت شخص مش اجتماعي وبتجنب مواقف اتعامل فيها مع الناس، لكن لما اشتغلت في عمل تطوعي بقيت بتعامل مع ناس كتير ومع الوقت بقيت اقدر اتعامل مع أي حد بسهولة

مخطط تبقى ايه بعد 5 سنين؟

بلاش الإجابات العامة في السؤال ده، المفروض يبقى عندك أهداف طويلة المدى وتبقى عارف انت عايز توصل لاايه، حاول على قد ما تقدر تبقى محدد في إجابتك … ممكن تبحث في التدرج الوظيفي للوظايف في نفس المجال والمستوى اللي انت عايز توصل ليه في المستقبل من خلال وظيفتك أو أي حاجة تانية ممكن توصلك لهدفك زي الدراسة مثلا.

بالنسبة للمرتب، ايه المبلغ اللي تتوقعه؟ والسؤال ده اتكلمنا فيه قبل كده وجالى ملحوظة عليه بس بكرره تانى من الملحوظة اللى اخدتها عنه

متجاوبش السؤال ده على طول ببساطة كده، حتى لو عندك فكرة عن مستوى مرتبات الوظيفة دي…طبيعي تكون عايز أعلى مرتب ممكن توصله في الوظيفة دي، والشركة كمان طبيعي تبقى عايزة تشغلك بأقل مرتب تقبل بيه… ممكن قبل المقابلة تسأل عن مستوى المرتبات في الوظيفة دي، وترد على السؤال وتقول انك من خلال معلوماتك عارف أن مستوى المرتبات للناس اللي عندهم نفس سنين خبرتك بيتراوح ما بين….و…..

عندك أي أسئلة؟

سؤال غالبا لازم يتسأل في نهاية كل مقابلة عمل، خليك دايما محضر اسئلة لانك لو قلت انك معندكش اسئلة هيبان انك مش مهتم بالوظيفة أو انك ما صدقت ان المقابلة تخلص… ممكن تسأل مثلا في حالة اني نجحت في المقابلة، المفروض أبدأ شغل امتى؟، ممكن كمان تسأل انت لو اتقبلت في الوظيفة هشتغل في ايه بالضبط؟.

وبعتذر على الاطالة فى اسئلة تانية كتيييير بس دول اهمهم

بالتوفيق ان شاء الله

 المصدر  : مدونتى  http://blogg-y.blogspot.com/ الكاتب : quik connect